அக்குபஞ்சர் - ஆக்கும் சுற்று - அழிக்கும் சுற்று

அக்குபஞ்சர் - 

இயற்கை வைத்தியம்

ஆக்கும் சுற்று - அழிக்கும் சுற்று

 

பிரபஞ்சம் ஓர் "முழுமை

"பிரபஞ்சம் ஒரு சிலந்தி வலை- அதில் ஏதாவது ஒரு இடத்தைத் தொட்டாலும் - வலை முழுவதிலும் அதன் அதிர்வு  உணரப்படும்" என்ற இணையதளத்தில் படித்த  சிலந்தி வலைத் தத்துவம் ("SPIDER WEB PHILOSOPHY")

மற்றும்

"பிரேசிலில் ஒரு பட்டாம்பூச்சி தன் சிறகினை அசைப்பதின் விளைவாக கனடாவிலுள்ள டொராண்டோவில் சூறாவளி எற்படுமா? " என்ற 1972ம் ஆண்டின்  "கேயாஸ் தியரி " (CHAOS THEORY")

- ஆகிய இரண்டு தத்துவங்களும் சொல்வது என்ன?

 

பிரபஞ்சம் ஓர் "முழுமை"

அதன்  அங்கமான நமது உலகமும், நாமும் தனித்தனியே - ஓர் "முழுமை"
     
 "பிரபஞ்சம்" - இன்னும் அது விஞ்ஞானிகளின் ஆராய்ச்சியில்தான் இருக்கிறது. முடிவுகள் வரட்டும். நமது முன்னோர்கள் ஏற்கெனவே கண்டறிந்தது சொல்லிவிட்டார்கள்  "அண்டமும்  பிண்டமும் ஒன்றே" என்று.

பூமியில்- எரிமலை வெடித்து, நெருப்புக்குழம்பை கக்கியபின் பூமிக்கடியில் ஏற்படும், வெற்றிடத்தை நிரப்ப, பாறைத்தட்டுகள் அசைந்து சரி செய்து கொள்கின்றன.  அது பூகம்பம். அதே பூகம்பம் கடலுக்கருகே அல்லது கடலுக்கடியில் நடைபெறுமானால், கடல் நீரின் சமநிலை பாதிக்கப்படுவதனால் சுனாமி ஏற்பட்டு, கடல் தன்னை சமப்படுத்திக் கொள்கிறது. புவியில் வெப்பம் அதிகமாகும்போது, நீரானது ஆவியாகி, மேகமாய் மாறி  மழையைப்பொழிந்து, பூமியைக்குளிரச் செய்கிறது, பூமியில் அதிகமாக பாயும் நீர், வெள்ளமாய் பெருக்கெடுத்து ஓடி மீண்டும் கடலிலே கலக்கிறது  - நமக்கு இது கண்கூடானது. உலகத்தை இயக்கும் பஞ்ச பூதங்கள் அதன் "முழுமைத்தன்மை" யினை நிலைக்கச்செய்யும் வகையில் நடத்தும் நிகழ்வுகள்தான்  இவை  யாவும்.

இதே வகையாக, நமது உடலிலும், பஞ்சபூதங்கள் ஒரு வரிசைக்கிரமமாக, ஒன்றின் இயக்கக்திற்கு மற்றது காரணமாக அல்லது உறுதுணையாக இருக்கிறது. - அதே நேரத்தில் மற்றொரு வரிசையில் ஒன்று மற்றொன்றை தனது கட்டுப்பாட்டிற்குள்ளும் வைத்துக்கொண்டு ஒரு "முழுமை"யினை நிலை நிறுத்தும் வகையில் செயல்பட்டுக்கொண்டிருக்கின்றன.

அந்த "முழுமை" எனப்படுவது வேறொன்றும் அல்ல;    நமது "நலம்" எனும் "ஆரோக்கியம்" தான்.

ஆக்கும் சுற்று 

"நெருப்பு - நிலம் - உலோகம் - நீர் - மரம்" என்ற வரிசையில் ஒன்றிலிருந்து அடுத்ததின் உருவாக்கம் வரிசைப்படுத்தப்பட்டுள்ளது.

         நெருப்பு குளிர்ந்து நிலமாகிறது (மண்ணாகிறது)
         நிலத்தினுள் உருவாவது  உலோகம்
         உலோகத்தை உருக்கினால் கிடைப்பது திரவம் - அதாவது நீர்
         நீரின் தன்மையால் வளருவது மரம்
         மரங்கள் உராய்வதினால் உண்டாவது  நெருப்பு
        மறுபடியும் நெருப்பு குளிர்ந்து நிலமாகிறது......

தவிர,  ஒரு மூலகக்திலிருந்து  மற்றொன்று உருவாவதால், உருவாக்கும் மூலகம் "தாய் மூலகம்"  எனவும் உருவாக்கப்பட்ட மூலகம் "சேய் / மகன் மூலகம்" என அழைக்கப்படுகிறது.

       "தாய்" மூலகம்             "சேய்" மூலகம்

            நெருப்பு                         -      நிலம் 

            நிலம்                              -      உலோகம்

            உலோகம்                     -      நீர் 

            நீர்                                     -      மரம்

            மரம்                                -      நெருப்பு

  


இவ்வுருவாக்கம், ஒரு தொடர் நிகழ்வாக அமைவதால், இது "ஆக்கும் சுழற்சி " (GNERATING CYCLE)  அல்லது சீனத்தில் Sheng Cycle  எனப்படும்.

அழிக்கும் சுற்று 

சில பல காரணங்களால், ஒரு மூலகத்தின் செயல்பாடு தேவைக்கு மேல் அதிகமாகும் பொது, அம்மூலகத்தின் "தாயின் தாய் மூலகம்", அதனை கட்டுப்படுத்தும் திறன் கொண்டது.

இவ்வகையில் -

  மரம் அதிக எண்ணிக்கையில் வளர்ந்து நிலத்தை ஆக்கிரமிக்கிறது.
  நிலமானது, தேவைக்குமேல்  நீரினை -  உறிஞ்சிக் கொள்கிறது.
  நீர் அதிகமாகி நெருப்பினை அணைத்து விடுகிறது.
  நெருப்பு அதிகமாகி உலோகத்தை உருக்கி விடுகிறது
  உலோகமாகிய காற்று அதிகமாகி மரத்தை சாய்த்து விடுகிறது.

இந்தச்சுழற்சி "அழிக்கும் சுற்று" (DESTRUCTIVE CYCLE) அல்லது சீனத்தில் Co Cycle  எனப்படும்.ஒரு மூலகம் மற்றொன்றினை அழிக்க முற்படும் செயல், கட்டுப்படுத்தும் வகையிலான  செயலாகவும் அமைகிறது. எனவே இது "கட்டுப்படுத்தும் சுற்று" எனவும் சொல்லப்படுகிறது.

எதிர் வினை சுற்று

 

ஒரு மூலகத்தின்  "சேயின் சேய் மூலகம்"  அம்மூலகத்தின் மீது எதிர் வினை  புரியவும் செய்கிறது.

அதாவது,

நிலம், தன்னை ஆக்கிரமிக்கும் மரத்தை வளரவிடாமல் தடுக்கிறது.
நீர் பெருகி நிலப்பகுதியை மூடிவிடுகிறது.
நெருப்பு நீரினை ஆவியாக்கி விடுகிறது.
உலோகமாகிய காற்றானது நெருப்பை அனைத்து விடுகிறது.
மரங்கள், அதிகமாக வீசும் காற்றை தடுத்து விடுகின்றன.

பஞ்சபூதங்களின் மேற்கூறிய சுழற்சி முறைகள் மிகவும் முக்கியமானவை. அக்குபஞ்சரின் சிறப்பு அம்சமான "நாடிப்பரிசோதனை"யின்படி, சிகிச்சைக்கான புள்ளிகளை தேர்வு செய்ய, இத்தத்துவம் மிகவும் அவசியமானது. பல சந்தர்ப்பங்களில், ஒரே ஒரு அக்குபஞ்சர்  புள்ளியை மட்டும் தேர்வு செய்து சிகிச்சையளித்து, பல பிரச்சினைகளைத் தீர்க்கமுடியும். பிரச்சினையின் வெகு ஆரம்பக்கட்டத்திலேயே அதை இனம் கண்டு, அதை வளரவிடாமல் தடுக்கும் வழியும், அக்குபஞ்சர் சிகிச்சையில் நிறைய உண்டு.

                                                         "வருமுன் காப்போம்"

 

 

 

 

வாய் - உணவு ஜீரணத்தில் உமிழ்நீரின் மகத்துவம்

வயிற்றில் பாதி வாயில் 

உணவு ஜீரணம் என்று சொன்ன உடனே நமக்கு , இரைப்பை, சிறுகுடல், பெருங்குடல் ஆகியவை தான் நினைவில் வரும் .  வாயினையும் ஒரு முக்கிய ஜீரண சக்தியுடைய உறுப்பாக பெரும்பாலும் கருத்தில் கொள்வதில்லை.

ஆனால் வாயினில் உணவினை நாம் மெல்லும்போது  நடைபெறும் நிகழ்வுகளை சற்று கவனித்தோமானால் "வயிற்றில் பாதி வாயில்" என்னும் கூற்றை அப்படியே ஆமோதிப்போம்.

உணவு ஜீரணம் என்பது வாயில் ஆரம்பித்து , இரைப்பை, சிறுகுடல், பெருங்குடல் ஆகியவற்றில் நடைபெறும் ஒரு தொடர் நிகழ்வாக அமைகிறது

பற்கள்  

நமது வயிறு வெறும் தசைகளாலானது என்பதை நாம் அறிவோம். அப்படி இருக்கையில் வாயிலிட்ட உணவை மெல்லாமல் அப்படியே விழுங்கினால் என்ன ஆகும்?

பற்களின் உபயோகம்தான் என்ன?

வெட்டும்  பற்கள், கிழிக்கும் பற்கள் மற்றும் அரைக்கும் பற்கள் என முப்பத்து இரண்டு பற்களை  - இறைவன் எதற்காக தந்திருக்கிறார்?

தாடையில் வேர்விட்டு வளரும் பல்லின் வெளிப்புறம் எனாமல் எனப்படும்  கடினமான பூச்சாக அமைகிறது.   எனாமல் நமது உடலிலேயே மிக கடினமான திசு ஆகும்.

மிக  கடினமான உணவுப்பொருட்களையும் அரைத்து தருவதன் மூலம்,  வயிறு  உணவை ஜீரணிக்க பற்கள் மிகவும் உதவுகின்றன.
 
அவசரமாக மெல்லாமல் உண்ணும் உணவு, அதிக அமிலச்சுரப்புக்கு காரணமாக அமைந்து, வயிற்றை மிகவும் கெடுக்கிறது.

குறைந்தது பத்திலிருந்து பதினைந்து முறையாவது, உணவை கடித்து மென்று கூழாக்கி உண்ணுவது அவசியம்.

"நொறுங்கத்தின்றால்  நூறு வயது "  என்று  நமது முன்னோர்கள் சொன்னது நூறு சதவிகிதம் உண்மை என்பதை, அதை கடைப்பிடித்தவர் நன்கு அறிவர்.

 நாக்கு 

உணவை  நாம் வாயில் இட்டதும்,  அதன் முதல் ஸ்பரிசம் நாக்குடன்தான்.  உணவினை பற்களால் மெல்லுவதற்கேற்ப, நாக்கின்   அசைவுகள் - பற்களுக்கு  இடையில் சிக்கிக்கொள்ளாமல்  - மிகவும் லாவகமானவை.

 அடிநாக்கின் அலைபோன்ற அசைவின் உதவியினால் தான் உணவை விழுங்க முடியும்.

.நாக்கில் அமையப்பெற்ற சுவையரும்புகள், நாம் நமது உணவினை தேர்ந்தெடுத்து உண்ண உதவுகின்றன. இது நாம் அனைவரும் அறிந்த ஒன்றுதான்.

ஆனால் நாக்கில் அமைந்துள்ள சுவை அரும்புகள் தன்மீது படும் உணவின் சுவையை அறிந்த கணமே - உணவின்  தன்மை, அதில் உள்ள சத்துக்கள், மற்றும் ஜீரணிக்க தேவையான இதர விஷயங்கள் பற்றிய தகவல்களை வயிற்றுக்கு - மூளை மூலமாக தந்தியடிக்கின்றன  என்பதை நம்மில் எத்தனை பேர் அறிவோம்?

 இந்த இடத்தில் மூக்கின் வாசனை அறியும் திறனும் சேர்ந்து செயல்பட்டு வயிற்றுக்கு தகவல் அனுப்பப்படுகிறது.

எந்தவிதமான  உணவு தன்னிடம் வந்தடைய இருக்கின்றது  - எந்த விதமான நொதியங்களைச் சுரக்கவேண்டும் - எந்த அளவிற்கு  சுரக்க வேண்டும்,  என வயிறு தீர்மானிக்க,  நாக்கு  அனுப்பும் சமிக்ஞைகள் உதவுகின்றன.

முறையாக சுவைக்காமல், அவசரமாக விழுங்கப்படும் உணவு, முழுமையாக ஜீரணிக்கப்படாது என்பது உண்மை.

உமிழ்நீர்

 

வாய் என்றதும் பற்கள் , நாக்கு தவிர நாம் நினைவில் கொள்ள வேண்டியது உமிழ்நீர் சுரப்பிகள்  தாம்.

வயது வந்த ஒரு நபருக்கு, நாளொன்றுக்கு- மூன்று வேளையும் உணவருந்தும்போது - சுமார் 1500 மிலி அளவுக்கு உமிழ்நீர் சுரப்பதாக  கணக்கிடப்பட்டிருக்கின்றது.  உமிழ்நீரில் 99.5% நீரும் 0.5% கால்சியம், சோடியம், பொட்டாசியம் போன்ற தாதுக்களும் மற்றும் நொதியங்களும் அடங்கியுள்ளன.

பற்களால் நான்கு அரைக்கப்பட்ட உணவில் உள்ள ஸ்டார்ச் எனப்படும் மாவுப்பொருளை,   உமிழ்நீரின் - அமிலேஸ்('salivary amylase') எனும் முக்கிய நொதியமானது,  டெக்ஸ்ட்றின்  மற்றும் மால்டோஸ் ஆக மாற்றுவதன் மூலம் ஜீரணம் வாயிலேயே ஆரம்பிக்கிறது - மேலும் இதன் தொடர்ச்சி வயிற்றில் நடைபெறுகிறது.

மனிதர்களுக்கு மட்டுமே உமிழ்நீரில் இருக்கக்கூடிய "மால்டேஸ்"  என்னும்  நொதியமானது "மால்டோஸ்"-ஐ  குளுக்கோசாக, அதாவது சர்க்கரையாக மாற்றுகிறது.

இதன்  மூலம்  வயிற்றில்  தரமான  நொதியங்கள் சுரக்க வழி  வகுக்கிறது  - விளைவாக -  கணையத்திலிருந்து  சுரக்கும் இன்சுலின் ஒத்துக்கொள்ளக் கூடிய பக்குவத்தில் குளுக்கோஸ் தயாராவதால் - நீரழிவு எனப்படும் சர்க்கரை நோய் ஏற்படுவது தவிர்க்கப்பட ஏதுவாகிறது.

சர்க்கரை நோயின்  ஆரம்ப கட்ட பாதிப்பில் இருப்பவர்கள்  - சரிவிகித உணவைத் தேர்ந்தெடுத்து, முறையான உணவு பழக்க வழக்கங்களை மேற்கொள்ளுவதுடன் - நன்றாக மென்று சாப்பிடும் முறையை கடைப்பிடிப்பார்களேயானால், அவர்களின் சர்க்கரை  நோய் குணமாகக்கூடிய வாய்ப்பும் அதிகம் இருக்கிறது.
 
"லிங்குவல் லைபேஸ்" எனப்படும் உமிழ்நீரிலுள்ள ஓர் நொதியமானது , நாம் உண்ணும் உணவிலுள்ள "பால்மக் கொழுப்பின்"  மீது  (pre-emulsified fats) வினை  புரிந்து கொழுப்பு  ஜீரணத்திற்கு உதவி  செய்கிறது.

இதன் காரணமாக - கோலஸ்டரால் - பிரச்சினை வராமல் இருக்கவும், தேவைக்கு அதிகமாக எடை கூடாத வகையில், உடலை பேணவும், நிறைய வாய்ப்பு இருக்கிறது. 

உணவை வாயில் அரைத்து சுவைக்கும்போதே உமிழ்நீரில் உள்ள "லைஸோஸைம்" எனும் நொதியம் உணவில்  கலந்திருக்கக்கூடிய சில கெட்ட  பாக்டீரியாக்களை அழித்துவிடுகிறது.

உமிழ் நீருக்கு இத்தனை சிறப்பா? உமிழ் நீரினை  நாம்  ஏன்  "உயிர்நீர்"  என்று சொல்லக்கூடாது?

டான்சில்

 

நாக்கைதாண்டி தொண்டையில் நுழைய எத்தணிக்கும் ஒரு சில  கெட்ட  பாக்டீரியக்களை தொண்டையினுள் இருபுறமும் துவாரபாலகர்களைப்போல  அமைந்திருக்கும் டான்சில்கள் துவம்சம் செய்துவிடும்.

உணவை, மெல்ல, நிதானமாக சிறிது சிறிதாக  அரைத்து விழுங்கும்போது, டான்சில்களில் சுரக்கும் உடலின் பாதுகாப்புப்படை வீரர்களான ,  நோய்யெதிர்ப்புசக்திமிகுந்த , பலவித வெள்ளை அணுக்கள் , உணவில் உள்ள கெட்ட பாக்டீரியக்களை கொன்றுவிடுகின்றன.  (இதையும் தாண்டி வயிற்றுக்குள் செல்லும் சில  கெட்ட கிருமிகளை வயிற்றில் சுரக்கும் அமிலம் கவனித்துக்கொள்ளும்.)

இத்தனை பாதுகாப்பு செயல்பாடுகள் இருந்தும் டான்சில்களில் கிருமிதொற்று ஏன் ஏற்படுகிறது?  உணவினை  நன்றாக உமிழ்நீர்  கலந்து, மென்று சாப்பிடாததாலும், நமது உடலில் நோயெதிர்ப்பு சக்தி குறைந்திருக்கும் காரணத்தினாலும், அளவுக்கு அதிகமாக கிருமித்தொற்று ஏற்படும் வகையில் நாம் உணவை தேர்ந்தெடுப்பதினாலும்தான்.
 
உணவை அள்ளி அள்ளி வாயினுள் போட்டு மெல்லாமல் அப்படியே விழுங்கினால்  பிரச்சினைதான்.

அகத்தின் அழகு வாயிலும் தெரியும் 

வாயினுள், நாக்கில், மற்றும் உதடுகளில் ஏற்படும்  சில புண்கள்,  இரைப்பை, சிறுகுடல், பெருங்குடல் ஆகிய ஜீரண உறுப்புகளில் ஏற்பட்டுள்ள சில பிரச்சினைகளை உணர்த்தும் "குறிகள் " ஆகின்றன.

 நமது முறையற்ற உணவுப்பழக்கங்களினால் இரைப்பையில்  ஏற்படும் அதிக அமிலச்சுரப்பு - உதடுகளில் உண்டாகும் புண்கள், மற்றும் உதடுகளில் தோல் உரிதல் போன்றவைகளுக்கு   ஒரு  முக்கியமான காரணமாக அமைகிறது.

தவிர, நாக்கில்  புண்கள் ஏற்படுவதற்கு - உணவில் சத்துக்குறைபாடு, தூக்கமின்மை,  மற்றும் மன அழுத்தம் போன்றவை காரணங்களாகின்றன.

காய்கனிகள், மற்றும் உணவுப்பொருட்களின்   மீது  ஒட்டியிருக்கும் செயற்கையான பூச்சி  கொல்லி  மருந்துகளை, சரியான முறையில் சுத்தம் செய்யாமல் சமையலுக்கு பயன்படுத்துவது,  தொண்டையில் புண்கள் ஏற்படுவதற்கு மற்றொரு காரணமாகிறது.

ஆரோக்கியம்  -  ஆரம்பம். 

           -  சிறந்த உணவு வகைகளை கவனமுடன் தேர்ந்தெடுத்து
           -  சிறு சிறு கவளங்களாக வாயிலிட்டு
           -  நன்றாக பற்களால் அரைத்து  
           -  தாராளமாக உமிழ்நீர் கலந்து
           -  நாக்கினால் நன்கு சுவைத்து

            - சிறிது சிறிதாக உணவை உண்ணும் முறையினை நாம் கடைப்பிடிக்க ஆரம்பிக்கும் அதே வேளையில்
   
                                           ஆரோக்கியம் ஆரம்பம்.

அக்குபஞ்சர் ஆரோக்கியம் - மருந்தில்லா மருத்துவம்

அக்குபஞ்சர் ஆரோக்கியம்

 

அக்குபஞ்சர் சிகிச்சைமுறை , சுமார் 5000 வருடங்களுக்கு முன்னர் சீன தேசத்தில் தோன்றியது என்று சொல்லப்பட்டாலும், அதன் அடிப்படை தத்துவம் நமது பாரம்பரிய வர்மக்கலை என்பதில் சிறிதும் சந்தேகமில்லை.

ஆரம்பத்தில் கூரான கற்கள் மற்றும் உலோக உபகரணங்களால் செய்து வரப்பட்ட அக்குபஞ்சர்,  சீன தேசத்தவரால் மிகவும் மெல்லிய உலோக ஊசிகளை பயன்படுத்தும் மிக எளிய சிகிச்சை முறையாக மாற்றப்பட்டது. அனால் கையால் அழுத்தம் கொடுத்து செய்யப்படும் அக்குபிரஷர் தொடுசிகிச்சை நமது பாரம்பரியத்தைச் சார்ந்தது என்பது மறுக்க முடியாத உண்மை.

அக்குபஞ்சர் தத்துவம் 

"அண்டம்" எனப்படும் (Galaxy ) பிரபஞ்சமானது நீர், நிலம், ஆகாயம், காற்று, நெருப்பு  எனும் ஐந்து மூலகங்களால் ஆனது.  பிரபஞ்சத்தின் ஓர் அங்கமாகிய "பிண்டம்" எனப்படும் நாமும் அதே ஐந்து மூலகங்களால் உருவாக்கப்பட்டவர்கள்தாம் . நாம் வாழும் இந்த பூமியும் அதே ஐந்து மூலகங்களால்ஆனது என்பதில் எள்ளளவும் சந்தேகமில்லை.  " அண்டத்தில் உள்ளதே பிண்டத்தில் உள்ளது."

பூமியானது தன் கட்டமைப்பான  - நீர், நிலம், ஆகாயம், காற்று, நெருப்பு - ஆகியவற்றில் ஏற்படும் ஏற்ற தாழ்வுகளை  தனக்கு தானே சரி செய்து கொள்ளுகிறது. உதாரணம் - எரிமலை, பூகம்பம், புயல், மழை போன்றவை. 

நீர், நிலம், ஆகாயம், காற்று, நெருப்பு -  எனும் ஐந்து மூலகங்களால்ஆன நமது  உடலும் தனது கட்டமைப்பில் ஏற்படும் ஏற்ற தாழ்வுகளை தமக்கு தாமே சரி செய்துகொள்ளும் ஆற்றல் பெற்றது.

விபத்துபோன்ற சந்தர்ப்பங்கள் , பாக்டீரியா , வைரஸ், பங்கஸ் மற்றும் பாரசைட்   போன்ற தொற்று  நோய்கள், கேன்சர், எய்ட்ஸ் மற்றும் நுண்கிருமிகளால் ஏற்படும் தீவிர கொள்ளை நோய்கள் தவிர  அநேக சுகவீன பிரச்சினைகளை
  ---இயற்கையோடு மாறுபடாத, ஆரோக்கியமான பழக்க வழக்கங்களை நாம் கொண்டிருக்கும் பட்சத்தில் ---
 நமது உடல் தன்னை தானே சரி செய்து கொள்ளும் திறன் படைத்தது.

http://apps.who.int/medicinedocs/en/d/Js4926e/5.html

ஒருவரின்  உணவு , உழைப்பு  மற்றும் உறக்கம்  ஆகியவற்றில் ஏற்படும் ஏற்றதாழ்வுகளினாலும் சுற்றுப்புற சூழ்நிலைகளினால்  ஏற்படும் பாதிப்பாலும் நமது உடலில் இயற்கையாக ஓடிக்கொண்டிருக்கும் உயிர்சக்தி ஒட்டத்தில் தடைகள் ஏற்பட்டு நோய் ஏற்படுகிறது.

 உயிர்சக்தி ஒட்டத்தில் தடைகள் ஏற்பட்டுள்ள நிலையில் நமது  உடல் தன்னை தானே சரி செய்து கொள்ளும்திறனை இழந்து நோய்வாய்ப்  பட ஏதுவாகிறது.

உயிர்சக்தி ஒட்டத்தில் ஏற்படும் தடைகளை நீக்கி உடலில் ஏற்பட்டுள்ள பிணிகளை குணமாக்குவது மட்டுமல்லாது மீண்டும் நோய் தாக்காதவண்ணம் பாதுகாத்துக்கொள்ளும் சிகிச்சை முறையாக அக்குபஞ்சர் or  அக்குபிரஷர் திகழ்கிறது.

நோய் அறிதல் 

அக்குபஞ்சர்  சிகிச்சை முறையில் நோய் அறிதல் மிகவும்  எளிமையாக்கப்பட்டுள்ளது. "அகத்தின் அழகு முகத்தில் தெரியும் " என்ற கூற்றுப்படி ஒருசில நோய் தாக்கங்களை முகத்தில் ஏற்படும் குறிகளைக்கொண்டு அறிந்து கொள்ளலாம்.

அடுத்ததாக நாக்கு. நாக்கின் நிறம், அமைப்பு, நாக்கின் மீதுள்ள படிவங்கள் , நாக்கில் தோன்றியுள்ள குறிகள் ஆகியவற்றின் மூலமாக ஒருவரின் ஆரோக்கிய நிலையில் ஏற்பட்டுள்ள பிரச்சினைகளை அறிய ஏதுவாகிறது.

அடுத்ததாக, எச்சரிக்கை புள்ளிகள் எனப்படும் சில அக்குபஞ்சர் புள்ளிகளை  தொட்டு உணர்ந்தும் சில உடல் பிரச்சினைகளை கண்டறிய ஏதுவாகிறது.

அக்குபஞ்சர்  சிகிச்சை முறையில்  மிக முக்கியமானதாக "நாடிப்பரிசோதனை" அமைகிறது. இரண்டு கைகளிலும் நாடி பார்த்து  நமது உடலில் - நீர், நிலம், ஆகாயம், காற்று, நெருப்பு - ஆகிய மூலகங்களின் செயல்பாட்டில் ஏற்பட்டுள்ள  ஏற்ற தாழ்வுகளை  கண்டறிய முடிகிறது. கல்லீரல், நுரையீரல், வயிறு, பெருங்குடல், சிறுநீரகம், இதயம், சிறுகுடல் போன்ற உள்ளுறுப்புகளின்  செயல்திறனை மட்டுமல்லாது, மனம் சம்பந்தப்பட்ட அனைத்து பிரச்சினைகளையும் கூட அறிய முடிகிறது.
  
அக்குபஞ்சர் சிகிச்சை
தேவைக்கேற்றவாறு,  அக்குபஞ்சர் புள்ளிகளில்  நாடி சமன்பாட்டு கோட்பாடுகளின் படி சிகிச்சை தரும்போது நோய் குணமாக்கப் படுகிறது. நாடிப்பரிசோதனை மூலம் உடலில் நோய் தோன்றக்கூடிய  சாத்தியக்கூறு களை யும் முன்னதாகவே அறிந்து கொண்டு , நமது உணவு மற்றும் பழக்க வழக்கங்களை மாற்றிக்கொள்வதன் மூலம் நோய்வாய்ப்படாமல் தப்பித்துக்கொள்ள ஏதுவாகிறது.

 உடல், மனம் : 

மனதில் தோன்றும் அதிக உணர்ச்சிகளும் பல நேரங்களில் நமது நோய்க்கு காரணமாக அமைகிறது- அல்லது நாம் உண்ணும் உணவுகளின் தன்மைகளினால்  நமது உணர்வு நிலைகள் பாதிப்படைந்து அதன் காரணமாக நமது உடலில்,  தேவைக்கு அதிகமாக , அல்லது தேவைக்கு குறைவாக சுரக்கும் இயக்குநீரின் ((hormones and other secretions) தன்மைகளைப் பொருத்து நோய்வாய்ப்படவும் நிறைய வாய்ப்புள்ளது.

 உடல், மனம் ஆகிய இரண்டில்  - ஒன்று பாதிப்படையும்போது  அது மற்றொன்றையும் பாதிக்கும்  என்பது மறுக்க முடியாத உண்மை. இரு வகைகளிலும் தோன்றியுள்ள பிரச்சினைகளை " நாடிப்பரிசோதனை " மூலம் தெளிவாக அறிந்து கொண்டு சிகிச்சை  தருவது அக்குபஞ்சரின் சிறப்பு.

ஆரம்பகட்டத்தில்  உள்ள மனம் சம்பந்தப்பட்ட பிரச்சினைகளுக்கு அக்குபஞ்சர் பக்கவிளைவுகள் இல்லாத அற்புதமான சிகிச்சையாகும்.  கோபம் , துக்கம் , கவலை, பயம் போன்ற உணர்சிகள் அளவுக்கு அதிகமாகும் போது  அவற்றை கட்டுப்படுத்தி ,  நாம் நோய் வாய்ப்படுவதிலிருந்து தப்பித்துக்கொள்ள அக்குபஞ்சர் சிகிச்சை மிகவும் உதவுகின்றது.

தவிர, நோய்வாய்ப்பட்டவரின் அன்றாட உணவு மற்றும் பழக்க வழக்கங்களை கேட்டறிந்து  அவர்களுக்கு தகுந்த ஆலோசனைகள் தருவது ஒரு அக்குபஞ்சர் மருத்துவரின் கடமையாகிறது. அதன் மூலம் "வருமுன் காப்போம்" என்ற வகையிலும் அக்குபஞ்சர்  சிகிச்சை நமக்கு மிகவும் கை கொடுக்கிறது.

அக்குபஞ்சர்  சார்ந்த சிகிச்சை முறைகளாக, பாத அழுத்த சிகிச்சை, கை அழுத்த சிகிச்சை, காது அக்குபஞ்சர், தலை அக்குபஞ்சர்  போன்ற சிகிச்சை முறைகளும் நல்ல பலன் தருபவை.

மருந்துகள் ஒத்துக்கொள்ளாத போது  மட்டுமல்லாது , நோய் வருமுன் நம்மை பாது காத்துக்கொள்ளும் வகையிலும்  கைகொடுக்கும் அக்குபஞ்சர் மருத்துவத்தின் மகத்துவம் நம்மை வியக்க வைக்கிறது.


                                                        "வருமுன் காப்போம்"